2024年10月 名護言葉講座を開催しました

10/5(土)に、2024年10月ぬ 名護言葉講座 開催ひち っちゃんどーをー。

前めーまでぃや うぬ会「名護ゆんたく会」でぃ 言ちゃくたしが、しんかんきゃーとぅ ゆんたく すーぬ会や また別ち 開催しー欲ぶはーとぅ、うぬ会や「名護言葉講座」でぃ 言ぬ事 なちゃんどーをー。

9月ぬ会や もーちゃぬ人 少らはたしが、うぬ10月ぬ会や 多ぽーくぬ しんかぬ もーてぃとぅらーしんそーち、いっぺー うそーはたぬ会 なちぇーさ をー。

Aとぅ Bや じるが ～はが？　Aぬる/がる Bかん ～はる。

「Aとぅ Bや じるが ～はが？」「Aぬる/がる Bかん ～はる。」や、二たーちぬ物むん 比びーぬばすぬ 問とぅーい様とぅ、いれー様 えんどーをー。

• えんちゅーとぅ うさぎや、じるが ぐなーはーが？
  えんちゅーぬる　うさぎかんや ぐなーはーる。
  うさぎや、えんちゅーかん まぎはん。

うん如ぐとぅち、二たーちぬ物むん 比びーぬばすぬ 文例ぬ テキストんがてぃ 多ぽーく 出いじてぃ っちゃーとぅ、大和口やまーとぅぐちち 訳ぬ 書はかっとぅねんらわん、肝故きむえーぬ わかいぬ如ぐとぅ 工夫 さっとぅてーんどー をー。
※ハイスさんが テキストや、ちゃー うん如ぐとぅち、むる 沖縄口うきなーぐちち 書かっとぅんどーをー。（イマージョン・プログラムでぃーし えーらぱじ。）

形容詞の語彙

また、うぬ 二たーちぬ物むん 比びーぬばすぬ 文ぬ稽古きーくすーが為 でぃ 思いしが、色数いるはじな 形容詞ん 紹介さっとぅたんどーをー（＝「形容詞の語彙」）。

うぬ中なはんてぃ 我にが 殊ふとぅに うむっさたしや うりんでー えーさ をー。

• しーぺーはん
• うぶらーはん
• うじらーはん

しーぺーはん

他ぬしまんてぃや 「しーさん」んでぃ 言いぬ めーぬ 多ぽーはらぱじやーをー。

元々、山原言葉や（むるぬ しま あらんしが）形容詞ぬ「～さん」→「～はん」ないんでぃぬ 変わとぅぬめーぬ あいとぅ、「しーはん」でぃぬ形 ないぎはーしが、名護言葉んてぃや 「しーぺーはん」でぃ 言んでぃぬ話ぱなーしえーたさをー。

肝故きむえーや 違いしが、うりん また 名護言葉ぬ 変わとぅぬ語彙る えーしが、「わたぺーはん」（腹わた 満みっちゅぬ 様）でぃーしぬ あてぃ、うりとぅ 響ぴびーききぬ 似ちゅさやー、でぃ 思うむたさ をー。

うぶらーはん

うり、我わにや 初ぱじーみてぃ 聞くしる えーたさ をー。

「うぶらーはん」でぃ 言ぬばす、うぬ 対象んがてぃ ないしや ゐけが びかー えん でぃ。

また、「うぶらーはん」でぃーしや、かーぎぬ 良ゆたーはぬ人んがてぃ 言し えーぬ ぷーじー えしが、なー うっぴ 細ふめーきてぃ 言いねや、「美くらすがい ひち、分ぶんぬ あいぎはーぬ 様」びかーにる 使しからりーる んでぃぬ話ぱなーし えさ をー。

あんすとぅ、うり 表すんでぃち、テキストんがてぃや、美くらかーぎーぬ ゐけがんきゃーぬ 絵ゐーぬ 下しちゃに、「ゐー かーぎ や ゑーしが、うぶらーくや ねん」でぃ 書はかっとぅてーさ をー。（笑）

うじらーはん

うり、言葉とぅ うぬ肝故自体きむえーじてーや 我わにん 知っちゅたしが、いきむし にや 言らんでぃーしや、今日くー 初ぱじーみてぃ 知っちゃさ をー。（赤んぐゎーでえ、人ちゅうんがてぃる 言る んでぃち。）

うり わかーらんたとぅ、今なままでぃ、我わにが 愛かなは しち ちぇーぬ いきむしーたぬ 話ぱなーし すーぬばすに 言ちゅたが すーら わかーらんさ をー。（笑）

今日くーぬ 名護言葉講座や 上うぃーぬ如、新みーく 覚うびてーぬ事ぬ まんでぃ、でーじな いーるきはぬ会る えてーさ をー。

次や 11/2(土)に 名護言葉講座 しー欲ぶはんでぃ 考えとぅしが、うぬばーん また 今日とぅ 同いぬ如ぐとぅ 良い会 ないねー 上等えさやー をー。